2 ديسمبر، 20:45

قراوني عدد كبير من الأساتذة أغلبهم ممتازين علما وأخلاقا…
لليوم أستاذي متاع العربية سي عبد الوهاب الزواري نقول له سيدي، ونحسها تطلع من قلبي بالفم والملا…ونشيخ كيف يكلمني ساعات يسأل على اخباري..
لليوم كيف نقابل سي عبد المجيد الشرفي والا سي حمادي صمود نحشم وما نلقاش كيفاش نتحاور معهم رغم لطفهم وسعة صدرهم…
لليوم كيف نشوف مدام سارة زين العابدين القروي أستاذة الفرنسية، وساعات تحضر لي محاضرات، نبدأ من داخل مرعوبة وخايفة لا نزلط قدامها….
لليوم كيف يعلقو لي على تدويناتي سي الجطلاوي وسي الحمامي نفرح كيف البنية الصغيرة اللي قال لها معلمها: صحيت بنتي…
عشرات وعشرات…أكثرهم رحلوا بحكم العمر (اليعلاوي، الدشراوي، المغيربي، الكناني، المهيري…) وكل ما نتفكرهم نترحم عليهم ..ونحس اللي فضلهم علي ما عندوش ثمن…
الله يرحم محمود المسعدي اللي عمل منظومة تربوية تضرب بها الأمثال…
واللي ما عندوش خير في معلميه وأساتذته ما عنده خير في أحد…